HATAW! D'yaryo ng Bayan hatawtabloid.com
I-FLEX
ni Jun Nardo
TINAPOS muna ni direk Darryl Yap ang grand prescon ng Viva movie niyang Martyr or Murderer at pinababa sa stage ang cast bago siya naglitanya ng pasabog laban sa director na si Joel Lamangan na tatapatan ang movie niya sa showing nito sa March 1.
Eh sa nakaraang presscon ng movie ni direk Joel, sinabi niyang ang Viva movie ang tumapat sa kanila. At saka ipinakita ni direk Yap ang video clip ng pahayag ni Lamangan na tatapatan nila ng next movie niyang ginawa ang Maid in Malacanang.
Kinukulit si direk Darryl ng press at vloggers tungkol sa bagong pahayag ni Lamangan kaya nagsalita na mas mainit na pasabog.
“Actually it’s not us who made tapat,” panimula ni Yap.
Bahagi pa ng pahayag ng MOM director, “I guess ‘yung masasakit na salita na pinalalabas nila sa boss ko at sa producer ko, hindi dapat palagpasin.
“Ayoko kasi na magpo-post ako online at masasaktan ko ‘yung mga taong hindi dapat masaktan.
“‘Yung sinasabing ginawa ang ‘Martyr or Murderer’ para tumapat sa kanila, isang malaking kalokohan ho ‘yon.
“Direk Joel, huwag po nating lolokohin ang mga tao. Ang tanda-tanda mo na, sinungaling ka pa.
“Ang hindi ko pagsasalita laban sa ‘yo ay kabaitan hindi ‘yun karuwagan.
“Huwag mong sasabihin na ang producer ay takot na pondohan ka kasi anti-Marcos ka. Walang ginagawa ang gobyernong sikilin ang media at cinema.
“Kaya natatakot ang producers, baka mag-flop ka. Tigilan na natin ang panloloko at pantatanga sa mga filipino.”
Dugtong pa ni Darryl, “Wala ko akong award kahit isa. Wala akong panama sa laki ng pangalan ninyo.
“I look up to you. Even to you Miss Cherry Pie.
“Ang tatanda n’yo na, ang sinungaling ninyo pa!” matapang pang sabi ng MOM director.
Babala pa ni Yap, “Hindi ninyo ako puwedeng sipa-ipain! Direk Joel, kaoopera mo lang noong December. Huwag kang magsinugaling na kami ang tumatapat sa ‘yo. Kayo ang tumapat!”
Ano kaya ang ending ng bakbakang ito nina Joel at Yap?
