HATAW! D'yaryo ng Bayan hatawtabloid.com
ALAM MO NA!
ni Nonie Nicasio
KAABANG-ABANG at exciting na pelikula ang An Affair to Forget na mapapanood sa Vivamax Original Movie, simula December 23, 2022.
Tampok dito sina Sunshine Cruz, Allen Dizon, Karl Aquino, & Angelica Cervantes, at mula sa direksiyon ni Louie Ignacio.
Ukol ito sa isang napariwarang anak, at isang asawang nandiyan pero parang wala, ito ang araw-araw na buhay ni Rowena (Sunshine). Kahit na magaling at kilalang abogada, hindi niya masolusyonan ang mga sariling problema sa bahay.
Ang anak niyang si Charles (Karl) ay madalas na napapasama sa gulo, kaya napapaaway sa mga bar at nadadala sa presinto. Ang asawa namang si Oscar (Allen) na isang struggling artist ay madalas malayo ang loob at pinaghihinalaan din ni Rowena na mayroong ibang karelasyon.
Para makompirma ang cheating allegations laban sa asawa, buong tapang at pikit matang iha-hire ni Rowena ang sex worker na si Beth (Angelica) para akitin ang asawa at i-report nito sa kanya ang mga gagawin nila.
Magtatagumpay na maaakit ni Beth si Oscar at magpapatuloy ang inaakalang lihim na relasyon ng dalawa. Pagpapatansyahan at maglalaro naman sa isipan ni Rowena ang mga detalye na ibinabalita sa kanya ni Beth sa kung ano ang mga ginagawa nila ni Oscar.
Kokomprontahin ni Rowena ang asawa ukol sa nalalaman nito, na susubukan pa sanang itanggi ni Oscar pero sa huli ay aamin din at mapag-uusapan ng mag-asawa na magsimula muli at isalba ang kanilang pamilya.
Pero ang pangalawang pagkakataong ito para sa relasyon nila ay hindi magiging maganda para kay Beth dahil tuluyan na palang nahulog ang loob nito kay Oscar. Dito na maiisipan ni Beth na maghiganti laban kina Rowena at Oscar, at gagamitin nito ang kahinaan ng mag-asawa, ang anak nilang si Charles.
Inusia namin ang aktres kung ano ang role niya sa An Affair to Forget?
Lahad ni Angelica, “Sa role ko po, gano’n din. Beth is mysterious. you don’t know what goes inside her head, kung anong gagawin niyang susunod, kung anong pinanggagalingan ng mga ginagawa niya but if you watch the movie, everything will make sense in the end.”
Ano ang masasabi ni Angelica sa kanilang movie at gaano siya ka-daring dito?
Tugon ng aktres, “typical daring po, but since magaganda yung shots ni direk Louie, it’ll look extra and artistic at the same time. hindi siya kabastos-bastos tignan.”
Sambit pa ni Angelika, “Siguro po I’d describe it as peculiar. you think you know what’ll happen next, but you don’t.”
Ipinahayag din ng aktres na isang karangalan para sa kanya na makatrabaho ang mga co-actors niya sa pelikulang ito.
“It was an honor working with them po especially sina Ms. Sunshine and sir Allen. buti na lang po, kahit paaano hindi ako nahiya na mag-ask for tips and suggestions off take. They’re approachable po and na-motivate rin ako sa sinabi nila na nanggaling din daw po sila sa ganitong phase, na halos lahat ng projects nila ay daring. which means na they’ve worked really hard to get where they are now.
“Si Karl naman po, first time ko siyang naka-work sa project. But since same po kami ng management, we’re comfortable with each other na and walang ilangan,” pakli pa ni Angelica.
Mapusok, madugo, masalimuot… ang An Affair to Forget ay isa na namang sexy-drama-thriller mula, streaming exclusively on Vivamax, simula December 23, 2022. Mag-subscribe na sa Vivamax sa halagang P149 kada buwan, at P399 naman para sa tatlong buwan. Bisitahin ang web.vivamax.net o i-download ang app at mag-subscribe sa Google Play Store, Huawei App Gallery and App Store.
