HATAW! D'yaryo ng Bayan hatawtabloid.com
HATAWAN
ni Ed de Leon
PALAGAY namin, hindi pa nga siguro ito ang tamang panahon para si Sunshine Cruz ay pumasok na muli sa buhay may asawa. Bagama’t ilang buwan lamang ang nakararaan inaamin naman niyang na-in love na siyang muli, ngayon ay sinasabi niyang mukhang hindi sapat iyon para masabi niyang handa na siyang muli na magpatali habambuhay.
May isang quote na inilagay ni Sunshine sa kanyang social media account na nagsasabing may mga taong makakapasok sa iyong puso at siguro dapat na manatili na lang sila roon at huwag mo nang patuluyin sa iyong buhay. Tama iyon. Maraming mga bagay na dapat isipin maging ang mga taong tunay na nagmamahalan para sabihing makakapagsama na nga sila habambuhay. Kung hindi nga naman ninyo mapapangatawanan ang isang pagsasama habambuhay, bakit pa ba kayo magsasama in the first place?
Ganyan din naman ang nangyari sa kanya noon. Nagkaroon siya ng boyfriend. First boyfriend niya eh, at kahit na may naririnig na siyang negatibo, ang nasa isip pa rin niya ay in love sila sa isa’t isa, at akala nila sapat iyon para sa isang magandang buhay. Pero sa paglipas ng panahon, nakita nila ang mga problema. Marami pala silang hindi mapagkakasunduan, hanggang sa umabot sa kanilang paghihiwalay.
May nangyari nang nauna eh, Natural mas maging maingat na si Sunshine ngayon. Iba pa ang sitwasyon noong unang dalaga pa siya, eh ngayon bukod sa sarili niya may tatlong anak pa siyang kailangang intindihin. Paano kung sila ang magkaroon ng problema? Kaya hindi ninyo masisisi si Sunshine kung maging mas maingat pa siya ngayon bago pumasok sa panibagong relasyon.
