Sunshine in-unfollow na si Macky, pictures sa socmed binura rin

HATAWAN
ni Ed de Leon

HATAW ang messages ng panghihinayang ng fans matapos kumalat ang espekulasyon na nag-split na nga sina Sunshine Cruz at ang boyfriend niya ng limang taon, ang konsehal ngayon ng San Juan na si Macky Mathay.

Maging ang pinsan niyang si Donna Cruz ay nag-post din ng message na nakikisimpatya kay Sunshine.

Wala namang anumang nasabi at nagsimula iyan nang mapansin nila na in-unfollow na ni Sunshine si Macky at inalis na rin ang lahat ng pictures nila sa kanyang social media account. Tapos for the first time in years, absent nga si Macky sa birthday celebration ng anak ni Sunshine na si Angelina na dati naman niyang ginagawa. Kahit na nga naroroon pa si Cesar Montano na dating asawa ni Sunshine at ama ng mga bata, naroroon pa rin si Macky. In fact kamakailan, noong debut ni Sam, isa pang anak ni Sunshine ay naroroon si Macky, kahit na nandoon din si Cesar.

Si Cesar naman ay may live-in partner na rin at tatlo na ang anak sa kanyang kasama sa ngayon.

Si Sunshine ay libre na matapos ang annulment ng kasal nila ni Cesar, ang naging problema lang dati, ang kasal ni Macky sa dating asawa ay hindi pa annulled. Nagkakilala silang dalawa dahil si Macky ay kapatid sa ama ni Ara Mina na siyang nagpakilala sa kanila. Naging mabilis ang kanilang ligawan, at tumagal sila nang mahigit limang taon, kung totoo ngang split na sila.

Gayunman, may mga naniniwala na nagkagalit nga lang siguro ang dalawa at posible pa ring magkasundo, Naka-follow pa rin si Macky sa social media account ni Sunshine at posted pa rin ang kanilang pictures.