Julia nakipagsabayan kay Carlo

I-FLEX
ni Jun Nardo

KAHIT sinong lalaki, hindi magsasawang papakin at dilaan si Julia Barretto kung sakaling isa siyang candy.

‘Yan ang naging kapalaran ni Carlo Aquino na nang unang matikman si Julia sa pelikulang Expensive Candy ng Viva Films, gusto siyang laging tinitikman hanggang sa umibig siya rito.

Yes, sexy, mapang-akit at hindi nakasasawa si Julia sa movie. Ang magbenta ng kanyang laman ang hanapbuhay niya.

Eh, magaling ang director ng movie na si Jason Paul Laxamana kaya naman hindi malaswa ang dating ni Julia kahit pokpok ang character, nakikipag-sex at nagsusuot ng sexy outfits.

Gaya ng mga nakaraang movies ni Carlo, magaling siyang umarte bilang isang virgin na teacher na nagmahal ng isang pokpok.

Muling ipinakita ni direk Laxamana ang isang lugar sa Pampanga na tinatawag noon na, “Area.” Sa lugar na ito dumarayo ang kalalakihan upang tumikim ng babae.

Ang movie ni Ai Ai de las Alas na tumatalakay sa mga babaeng nagtatrabaho roon ang naalala namin sa movie. Wala na ang lugar na ito sa Pampanga.

Bongga si Julia dahil nagawa niyang makipagsabayan sa pag-arte kay Carlo, huh!  Lalo na sa huling bahagi ng movie na mapapanood sa sinehan sa ngayong September 14.