HATAW! D'yaryo ng Bayan hatawtabloid.com
PINAGULONG ni Istulen Ola ang mga nakatunggali matapos nitong sakupin ang korona sa katatapos na 2022 PHILRACOM “2-Year-Old Maiden Stakes Race” na inilarga sa Metro Turf, Malvar – Tanauan City sa Batangas nitong weekend.
Lumabas na tersero puwesto ang anak nina Brigand at Close Haul na si Istulen Ola habang nasa unahan niya ang bumanderang si Alalum Falls at nasa pangalawang puwesto si Sylvia Plath.
Papalapit ng far turn ay parang posteng nilampasan ng pag-aari ni Melaine Habla na si Istulen Ola sina Alalum Falls at Sylvia Plath kaya naman magaan nitong tinawid ang meta.
Sinakyan ni John Alvin Guce, omoras si Istulen Ola ng tiyempong 1:25.2 minuto sa 1,400 meter race sapat upang sungkitin ang P600,000 premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.
Hinamig ni Sonic Clay ang second prize na P200,000, habang tig P100,000 at P50,000 ang third at fourth placers na sina Orange Bell at Stealing Heaven ayon sa pagkakasunod.
Pumang-lima si Bandido na nagbulsa ng P30,000 habang P50,000 ang inuwi ng breeder ng winning horse na si Arturo Sordan, Jr. (MB)
