HATAW! D'yaryo ng Bayan hatawtabloid.com
MANILA—Nagpatuloy ang pananalasa ng Laguna Heroes sa 2022 Professional Chess Association of the Philippines (PCAP) online chess tournament virtually na ginanap sa Chess.com Platform nitong Sabado, Hunyo 25, 2022.
Giniba ng Laguna ang Tacloban, 15.5-5.5, at Pagadian, 18-3, tungo sa 14-7 karta.
“Team effort pulled us through these two matches,” sabi ni Arena Grandmaster Dr. Fred Paez ng Jolly Smile Dental Clinic, isa sa apat na co-team owner ng Laguna Heroes na kinabibilangan nina Mr. David Nithyananthan ng KALARO at Greatech Philippines, Inc., Engr. Benjamin Dy ng SDC Global Choice Foods at Engr. Antonio Balinas ng AC Balinas Construction and Steel Works.
Narehistro ng Laguna ang 3.5-3.5 draw sa Tacloban sa blitz game kung saan ang full points ay mula kina two-time Asian junior champion Grandmaster Rogelio “Banjo” Barcenilla Jr (Board 1), import Woman International Master Ummi Fisabilillahh ng Indonesia (Board 3), Arena Grandmaster Kimuel Aaron Lorenzo (Board 6) at draws kay Fide Master Jose Efren Bagamasbad (Board 4).
Winasiwas ng Laguna ang Tacloban sa rapid event, 12-2, kung saan ang dalawang puntos ay kinamada nina Barcenilla (Board 1), Richie Jocson (Board 2), Fisabilillahh (Board 3), Bagamasbad (Board 4), Lorenzo (Board 6) at Christian Nanola (Board 7).
Kontra sa Pagadian ay malakas na sinimulan ng Laguna ang kampanya sa pagtarak ng 6-1 win sa blitz game mula sa panalo nina Barcenilla (Board 1), Lorenzo (Board 2), Fisabilillahh (Board 3), Bagamasbad (Board 4), Nanola (Board 5) at Orozco (Board 7).
Sinundan ng Heroes ang 12-2 panalo kontra sa Pagadian sa rapid event sa two points nina Lorenzo (Board 2), Fisabilillahh (Board 3), Bagamasbad (Board 4), Nanola (Board 5), Jocson (Board 6) at Orozco (Board 7).
-Marlon Bernardino-
