HATAW! D'yaryo ng Bayan hatawtabloid.com
HATAWAN
ni Ed de Leon
NOONG isang gabi, nagyaya ng dinner ang movie writer at PR man na si Jun Lalin, na ang talagang purpose naman ay kuwentuhan. Matagal na rin naman kaming hindi nakakapagkuwentuhan. Later on sinamahan kami ng isa pang kaibigan si Salve Asis. Hindi ka kasi mahagilap Tita Maricris.
Nang matapos ang aming dinner, nakatuwaan naming mag-selfie, tapos inilagay namin sa social media. Nagkataon naman sigurong naka-monitor sa social media si Ate Vi (Vilma Santos), kaya napakabilis ng kanyang comment na binabati lang naman kami ni Jun. We were very happy. Aba iyong mapansin ka ng isang Vilma Santos, na hindi lamang isang magaling na aktres kundi “lingkod bayan” awardee pa bilang
isang matapat na public servant, aba malaking bagay iyon.
Noong lumipat kami sa isang coffee shop at nag-selfie ulit, siguro naman by that time may iba nang ginawa si Ate Vi, nang magbiro si Jun na, “Salve, hindi na nag-like si Ate Vi noong kasama ka namin.” Pero iyon ay biro lang naman, na naging dahilan ng malakas na tawanan namin.
Pero talagang ganoon si Ate Vi kahit na noong araw. Ang dami niyang ginagawa sa office niya, lalo na noong panahong governor pa siya ng Batangas, pero hindi niya nakalilimutang kumustahin naman ang kanyang mga mga kaibigan. Nakakatawag siya. Nakakapag-text at ngayon natutuhan na rin niya ang social media. We all agreed na iyon ang kaibahan ni Ate Vi, concerned siya sa mga kaibigan niya.
Hindi mo makikita iyan sa ibang artista ha, na kahit anong tulong ang gawin mo, ni magpasalamat hindi man lang naaalala.
Naglitanya na nga si Jun ng mga artistang natulungan niya. Natatawa lang kami pero kasi ang ugali namin basta ganoon, hindi na namin pinapansin. Basta kami sinasabi lang namin kung ano ang masama at mabuti, kaibigan man namin o hindi. At sa totoo lang, iilan lang naman ang mga kaibigan namin kahit na mahabang panahon na kami sa industriyang ito. Sigurado lang kami na ang mga itinuturing naming kaibigan, kaibigan talaga. Iyong iba “trabaho lang iyan.”
