HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
HINDI pahuhuli si Ariella Arida sa pagpapakita ng kaseksihan at pagpapaka-daring sa mga kapwa niya beauty queen pero ayaw niyang makikipag-kompetensiya kina Cindy Miranda (Bb. Pilipinas Tourism 2013), Kylie Verzosa (Miss International 2016), at Janelle Tee (Miss Philippines Earth 2019).
Ani Ariella, hindi kompetisyon ang tingin niya sa paggawa nila ng pelikula. ‘It’s more of challenging yourself, especially ganoon naman sa life. Kung nasaan ka, it’s either laging may bagong dumarating.
“So, it’s challenging and it’s better to be like that. Kasi kung walang challenge, hindi mo mapu-push ‘yung sarili mo to do things na kaya mo palang gawin,” paliwanag ni Ariella sa isinagawang zoom media conference.
Nabanggit din ni Ariella na gusto niyang magsama-sama silang apat sa isang proyekto sa Viva.
“I’m actually dreaming na sa isang project, magkakasama kami. That’s exciting and kayo na ang bahalang humusga,” anito.
Sa Breathe Again, maraming sexy scenes sina Ariella at Tony Labrusca kaya natanong ang beauty queen kung hanggang saan ang limitasyon sa pagpapakita ng skin at handa ba siyang mag-all out.
“Basta depende sa story line, sa story ng film. Naniniwala naman ako na as long as it’s been taken very artsy something like that why not, sensual pa rin naman ang dating,” giit pa ni Ariella.
Actually hindi na bago kay Ariella ang paggawa ng mga maseselang eksena matapos maging bahagi ng mga pelikulang tulad ng Sarap Mong Patayin at More Than Blue.
Abangan kung gaano kainit ang kanyang eksena kasama si Tony. Ito ang unang pelikula ni Labrusca sa Viva matapos ang dalawang taon. Bumida siya sa Hindi Tayo Pwede noong 2020.
Ang Breathe Again ang unang full length movie ni Raffy Francisco na kilala bilang direktor ng mga TV commercial. Siya mismo ay mahilig sa dagat at ito ay makikita sa kanyang mga kuhang litrato.
Ipalalabas ang Breathe Again sa Vivamax sa June 3, 2022.
