Murang kuryente, langis possible kahit hindi ibasura tax measures

PROMDI
ni Fernan Angeles

KUNG gusto may paraan. Ito ang diin ni Energy Undersecretary Benito Ranque kasabay nang paghahayag ng mga pamamaraan kung paano pababain ang presyo ng kuryente at langis nang hindi na kailangan pang suspendihin ang excise at value-added tax.

Pagtitiyak ni Ranque, lubhang mahalaga ang bawat sentimo ng buwis na nalilikom ng gobyerno mula sa sektor ng enerhiya, lalo pa’t nahaharap na matinding pagsubok ang pamahalaan sa gitna ng krisis sa langis at patuloy na banta ng pandemya. 

Aniya, posibleng matabasan agad ng P3.26 ang presyo kada litro ng gasolina at P1.40 naman sa krudo kung didinggin ng Kongreso ang kanyang panawagang pagbalangkas ng isang House resolution na magbibigay daan sa suspensyon ng Biofuels Act of 2006 na nagtatakda ng ‘additives’ sa mga produktong-petrolyo.

Para sa naturang opisyal, ang ‘additives’ ay nakakadagdag lamang sa presyo ng mga produktong-petrolyong karaniwang gamit sa mga pampublikong transportasyon at mga industriyang nagbibigay empleyo.

“Those additives should be made an option. Hindi naman talaga kailangan ng mga pampasaherong dyip at bus ang additives. Those additives are meant to induce performance ng mga mamahaling sasakyan,” paliwanag pa ni Ranque.

Sa usapin ng mataas na buwanang singil sa kuryente, hinikayat niya ang susunod na administrasyon na palawakin ang mekanismo ng lifeline subsidy sa P800 mula sa kasalukuyang P400 kada buwan para sa mga konsyumer na kumokonsumo ng 100 kilowatts kada buwan.

“Eh sino lang ba ang ganun ang konsumo? Hindi ba yung mga pobreng Pilipinong walang aircon, refrigerator at mga appliances sa bahay,” pahabol pa ni Ranque na kinokonsidera para maging Kalihim ng Department of Energy (DOE).