HATAW! D'yaryo ng Bayan hatawtabloid.com
KINUWESTIYON ng netizens kung bakit nakalagay ang pangalan ng ilang politiko sa Ayuda form ng DSWD.
Base sa mga Facebook post ng ilang mga residente ng mga lungsod at bayan na kabilang sa Unang Distrito ng Cavite, nagtaka sila sa umano’y nakakabit na forms sa mga application para sa ayuda mula sa Department of Social Welfare and Development (DSWD).
Ayon sa mga report, ang mga opisyal na papeles para sa Assistance to Individuals in Crisis Situation (AICS) ng DSWD ay may tatak ng logo ng isang partylist group at ng ilang lokal na kumakandidato.
Kasama rito ang membership form para sa Agimat Partylist, Jolo Cares, Ricafrente at isa pang form para sa ‘precinct number,’ na nakadagdag sa pagkalito ng mga nais mabigyan ng ayuda.
Nabatid, ang AICS ng DSWD sa Cavite ay maaaring umabot P400 milyon. Ang naturang forms ay magpapaabot ng P2,000 sa mga kalipikadong residente.
Dahil sa logo ng mga grupong nakatatak sa mga papeles, nagkaroon din ng hinala na maaaring gamitin sa darating na halalan ang kanilang aplikasyon sa DSWD.
Sa posts sa social media accounts, unang napansin ang ibang forms sa bayan ng Rosario at kasunod nito ay nabunyag na may mga kumalat din sa mga bayan ng Noveleta, Kawit, at Cavite City.
Marami rin sa mga komento ay ang pagmamadali ng isang bigating politiko na maipamudmod agad ang ayuda, lalo sa mga nabanggit na lungsod at bayan sa Cavite.
