HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
HINDI napigilan ang Queen of All Media na si Kris Aquino na magtungo ng Tarlac para sa people’s rally nina presidential candidate VP Leni Robredo at vice presidential candidate senator Kiko Pangilinan noong Miyerkoles, March 23. Kasama ni Kris na nagpakita ng suporta sa Leni-Kiko tandem ang dalawang anak na sina Josh at Bimby.
Alam naman ng lahat na may iniindang karamdaman si Kris pero hindi siya napigilang magtungo ng Tarlac para ipakita ang kanyang suporta sa sinusupotahang kandidato sa magaganap na halalan sa Mayo 2022.
“I only found out yesterday na sa Tarlac pala ang rally ni VP Leni, so sabi ko, I’m going and nobody can stop me,” giit ni Kris.
Sa pag-akyat ni Kris sa entablado, hinila nito ang aktres na si Angel Locsin na bagamat laging present sa mga rally ni VP Leni, hindi ito umaakyat. Kaya nga nagkomento ito ng, “Bihira lang po ako aakyat sa stage kasi hindi naman po ako talaga sanay umakyat sa stage kahit artista ako, mas gusto ko kasama ko po kayo sa crowd.
“Kaya po ako lumabas dito dahil naniniwala po talaga ako kay VP Leni… kahit na anong ibato ninyo sa kanya, sabihin na natin lahat ng intriga, lahat fake news pero walang makaka-deny na sa lahat ng bagyo, sakuna, pandemya, hindi nila tayo pinabayaan,” sigaw ni Angel.
Sa kabilang banda, may ibinahagi naman si Kris ukol sa isang sulat na nakita niya mula sa kanyang kapatid at dating Presidente na si Noynoy Aquino. Ang sulat ay para kay VP Leni.
“I will reveal a secret because alam n’yo naman ako, madaldal. Noong namatay po si Noy, may sulat akong nabasa na in-address niya kay VP Leni. I will not reveal kung ano ang ibang laman niyon dahil confidential na ‘yon pero mayroong isang paragraph na talagang tumama sa puso ko.
“Sinabi ni Noy, sa lahat, meaning parang sinasabi niya sa lahat ng kapartido, ‘Sa ’yo ko nakikita na iisa ang pananaw, iisang ang vision.’”
“In other words sinabi ni Noy na, ‘Sa ‘yo ko nakikita ‘yung sincerity at ‘yung ability na unahin ang iba bago ang sarili.’”
Dahil dito nasabi ni Kris sa sarili na kailangang niyang manindigan para kay VP Leni.
“Alam n’yo po, noong nabasa ko ‘yon, sinabi ko sa sarili ko, ‘You have to fight for her dahil sa kanya bilib si Noy’”, sambit pa ng akres/tv host.
