HATAW! D'yaryo ng Bayan hatawtabloid.com
ALAM MO NA!
ni Nonie Nicasio
MAPAPANOOD this Sunday, Feb. 20 ang versatile na young actor na si Miggs Cuaderno sa Regal Studio Presents: Yaya Terror ng GMA-7.
Sina Miggs at Pokwang ang tampok sa partikular na episode na ito na mapapanood sa ganap na 4:35pm sa Kapuso Network.
Ipinahayag ni Miggs ang pagkabilib sa kakaibang husay ni Pokwang sa Regal Studio Presents.
Pahayag ng young actor, “Napakahusay po, kung ano ang hingin ni direk, agad-agad kaya po niyang gawin.
“Kapag pagpapatawa, talagang patawa. Kapag seryoso, naku, seryoso talaga! At kapag galit at kapag iyakan na, ay ang husay at iyak po agad,” pakli pa ng binatilyo.
Wika pa niya, “Kasi alam ko po komedyante siya at kilala siya rito talaga, pero napakahusay niya pong actress.”
Tungkol saan ang episode na mapapanood sa Regal Studio Presents?
Tugon ni Miggs, “Bale, iyong story po nito is yaya ko po si Ms. Pokwang at nasa abroad ang parents ko po.
“So, sa amin po umikot iyong story and abangan po nila ito, sa February 20 po ipalalabas.”
“Si Ms. Pokwang po rito si Yaya Mila, and ako naman si Jerome… ang director po namin dito ay si Direk Crisanto Aquino.”
Nabanggt pa ni Miggs, masaya siyang makatrabaho rito si Pokwang dahil marami raw natutunan ang binatilyo sa komedyana pagdating sa comedy, pati na rin sa drama.
Si Miggs ay napapanood din sa Prima Donnas Book-2 na tinatampukan nina Aiko Melendez, Katrina Halili, James Blanco, Benjie Paras, Sheryl Cruz, Chanda Romero, Wendell Ramos, Jillian Ward, at iba pa.
