Basher na kumuwestiyon sa pag-arte ni Rabiya nag-deactivate ng account

MA at PA
ni Rommel Placente

NOONG Lunes ay nag-post si Rabiya Mateo ng photos niya na tumutulong sa paggawa ng raisin bread sa Baguio Country Club sa Baguio City. Ang caption dito ng beauty queen turned actress ay,“Minsan action star, minsan panadero.”

Kaya ganoon ang caption niya ay dahil pinasok na rin niya ang pag-aartista.

Kasama siya sa Book 2 ng Agimat ng Agila, ang fantasy-action series  na pinagbibidahan ni Senator Bong Revilla. 

Dahil nga isang action ang show na ito ni Sen.Bong kaya mag-a-action din dito si Rabiya.

Sa comments section, isang basher ang nagkomento sa post ng sinasabing girlfriend ni Jeric Gonzales. Base sa account name ng netizen, isa itong medical technologist.

Tinawag nitong talunan sa Miss Universe pageant at ambisyosa si Rabiya.

Sabi ng basher published as it is, “Minsan Beauty Queen, Minsan drama queen. Pero kadalasan ambisyosa di naman marunong umarte, talunan pa sa MU [Miss Universe]. Crying emoji”

Sinagot naman ng mahinahon ni Rabiya ang basher. Sabi niya, “di naman siguro masama mangarap, yung masama mangbaba ng kapwa.

“Medical professional ka diba? Sana maging doctor ka gaya ng pangarap mo. Keep winning in life.”

Hindi na nag-reply ang bashe ni Rabiya, Agad niya kasing bunura ang kanyang comment. Mabilis din kasing nag-react ang supporters ni Rabiya.

Hinanap nila sa comments section ang basher, pero hindi na nila ito makita. Sabi ng ilan, nag-deactivate na ito ng account.

Pero may nakapag-screenshot ng komento ng basher at kumakalat na ngayon sa isang TikTok video.