HATAW! D'yaryo ng Bayan hatawtabloid.com
ISINUSULONG ng mga grupong Parents Enabling Parents (PEP) at ng IM Pilipinas na tumakbo sa pagkapangulo sa 2022 elections si Manila Mayor Francisco “Isko Moreno” Domagoso.
Handa umano ang dalawang grupo na maghatid ng lubos na suporta mula sa kandidatura hanggang sa pagbabantay ng mga boto ni Yorme sa halalan.
Sa ginanap na weekly forum ng Southern Metro Manila Press Club Inc., ni PEP president Philip Piccio, si Moreno ang kanilang nakitang may kalipikasyon na pamunuan ang bansa dahil buo ang loob nito, may political will, bata at physically fit, at tama ang ginawa niya sa Divisoria, ibinalik ang dating magandang Maynila.
Aniya, bukod rito ang mga isinagawang economic program ng alkalde, pabahay sa mahihirap at nasa kanya ang karanasan na mismong nanggaling sa mahirap kaya alam niya kung paano abutin ang masa.
Sinabi ni dating Department Executive Director IACT at IM Pilipinas Secretary General Elmer Argaño, maraming kalipikadong maging posibleng running mate ni Mayor Isko ngunit ipinauubaya nila ito sa kapasyahan ni Yorme.
“Nasa kanyang laya sa pagpili kung sino ang running mate niya. We are looking forward na kukuha siya ng tandem na katulad niya masigla, kung paano siya gumalaw at kung paano siya umabot sa masa,” paliwanag ni Argaño.
Sakaling si Pangulong Rodrigo Duterte ang mapili ni Yorme na running mate ay irerespeto ng PEP at IM Pilipinas ang magiging pasya ng alkalde at handa silang sumuporta rito.
Umaasa ang PEP at IM Pilipinas na tutugon si Yorme sa kanilang panawagan na tumakbong presidente sa darating na eleksiyon sa susunod na taon.
Sa ngayon wala pang political party na nag-aalok o nag-eendoso sa posibleng kandidatura ni Yorme bilang presidente ng bansa.
(JAJA GARCIA)
