HATAW! D'yaryo ng Bayan hatawtabloid.com
MA at PA
ni Rommel Placente
NAG-ALALA ang nga tagahanga ni Nora Aunor at marami ang nagtanong sa kanila kung may sakit ba raw ang kanilang idolo. Nag-post kasi si Ate Guy ng larawan sa kanyang fan page na nakaupo sa wheelchair habang pinagmamasdan ang mga halaman.
Tinanong namin ang isang malalapit kay Ate Guy at ayon dito, walang dapat ipag-alala ang kanyang mga tagahanga. Talaga lang daw umuupo sa wheelchair ang aktres lalo na kung may lalakarin na medyo malayo. Dahil may hika siya, hinihingal si Ate Guy na pinalalala pa ng napakainit ng panahon ngayon.
Pero nasa mabuti namang kalagayan ang Superstar.
Samantala, katatanggap lang ni Nora ng Hall of Famer award sa katatapos na Asia Pacific Luminare Awards. Kaya naman nagpapasalamat siya sa karangalang ito.
Bahagi ng ipinadala niyang mensahe, ”Hindi naman po sa pagbubuhat ng sariling bangko, may ilan na rin po akong ganitong klase ng parangal na natanggap mula sa iba’t ibang award-giving bodies. Pero nagugulat pa rin po ako, natutuwa, at minsan ay napapatanong din kung ako nga po ba ay karapat-dapat sa mga ibinibigay sa aking parangal.”
