HATAW! D'yaryo ng Bayan hatawtabloid.com
COOL JOE!
ni Joe Barrameda
MARAMI ang nagulat at na-excite sa magiging project ni John Lloyd Cruz sa GMA Network.
Noong Sabado, inanunsiyo na siya ay malapit nang mapanood sa GMA kasama ang owowin host na si Willie Revillame.
Nagkataong bumisita si John Lloyd sa summer hideaway ni Willie sa Puerto Galera kasama ang anak niya. Roon ay nagkausap ng masinsinan sina Lloydie at Wilie tungkol sa pagbabalik niya sa showbiz.
Ipinaramdam ni Willie ang suporta niya sa pagbabalik showbiz at hinikayat nito ang award winning actor na lumabas sa special show nila sa shopkeepers sa Linggo ng gabi at pagkatapos ay may binubuo silang project na si Willie mismo ang producer.
Matapos ‘yun ay gumawa ng paraan si Willie na magkausap si Lloydie at si Ms Annette Gozun para magkaroon si Lloydie ng project sa GMA. Kaya mukhang sure na ang GMA ang magiging bagong bahay ni John Lloyd.
Lumikha ng ingay ang recent announcement ng pagbabalik-showbiz ni John Lloyd. At talaga namang excited ang kanyang fans na mapanood siyang muli matapos niyang mag-break sa showbiz ng apat na taon. At masaya sila sa balitang mapapanood na nila ang kanilang idolo sa GMA para sa grand event ng isang shopping app sa June 6.
Ang inaabangan din ngayon ay kung bukod ba rito ay may iba pang projects na niluluto sina John Lloyd at Willie. Tutok lang sa GMA for more updates tungkol dito.
