John Lloyd kay Elias — utang ko ang buhay ko sa kanya

SA interview kay John Lloyd Cruz sa radio show ni Caesar Soriano, sinabi niyang malaki ang kinalalaman ng anak nila ni Ellen Adarna na si Elias Modesto,2, sa pagbabago ng pananaw niya sa buhay. Si Elias din ang nagbibigay-saysay sa kanyang buhay.

Sabi ni John Lloyd, ”Anak ko talaga ‘yung ano ko… ‘yun ang teacher ko. Malaki ang papel niyon sa kung bakit ako ay nandito pa ngayon.

“Malaki talaga ang papel niya kung bakit bumabangon ka, nagsusumikap ka. Kaya, naku, talagang malaki ang utang na… utang ko… utang ko ang buhay ko sa anak ko.

“Kung wala ‘yung anak ko, baka wala na rin ako rito.”

Almost 4 years nawala sa sirkulasyon si Lloydie nang mag-indefinite leave siya. Namuhay siya sa Cebu na kasama rati si Ellen. Pero naghiwalay nga sila.

Bukod pa rito, maraming pinagdaanan ang aktor na inakala niyang hindi niya malalampasan.

Pakiramdam ba niya ay napalapit siya sa Panginoon?

“’Yun ‘yung essence niyon. Parang there’s no other way kundi mas mapalapit ka pa,” sagot ni Lloydie.

Sa ngayon, nagpa­pasalamat si Lloydie dahil luminaw ang pananaw niya sa buhay.

“Lagi na lang akong nagpa­pasalamat sa kung anong mayroon ka dahil nakikita mo na. Parang luminaw ba, ‘di ba?

“Wala na yung mga agam-agam mo o paghahangad sa kung ano ‘yung wala ka.

“Kasi mas sumimple lang naman. Ang laki ng isinimple ng lahat.

“Simple lang pala siya. Nagpaikot-ikot ka pa. Simple lang pala siya.

“Ayun, makita mo kung ano ‘yung mayroon ka at makita mo ‘yung halaga kung ano ‘yung mayroon ka.”

Samantala, kinompirma rin ni Lloydie ang pagbabalik-tambalan nila ni Bea Alonzo sa pelikula.

MA at PA
ni Rommel Placente