HATAW! D'yaryo ng Bayan hatawtabloid.com
PUNTIRYA ni dating Senador Antonio Trillanes IV na maging susunod na presidente ng Filipinas pagbaba sa puwesto ni Pangulong Rodrigo Duterte sa 2022.
Ayon kay Trillanes, nais niyang maging standard bearer ng opposition coalition 1SAMBAYAN bilang kapalit ni Vice President Leni Robredo sa 2022 elections.
Nagpasya si Trillanes at ang Magdalo Group na sabihin sa 1SAMBAYAN ang balak na maging principal candidate mula sa alternate candidate ni Robredo sa pagka-Pangulo at lumahok sa nominasyon ng koalisyon.
Ani Trillanes, mahalaga ang nasabing hakbang para makasama sa selection process ng 1SAMBAYAN.
“Just to be clear, I am not dividing the opposition as there will only be one unified slate to be nominated by 1SAMBAYAN, and both VP Leni and myself have committed to support and campaign for its nominees,” sabi ni Trillanes sa kanyang Facebook post.
Tiniyak ng dating senador na aatras siya kapag nagpasya si Robredo na sumali sa 2022 presidential derby.
Habang hindi pa aniya malinaw ang political plan ni Robredo ay ihahanda na ni Trillanes ang kanyang magiging patakaran tungkol sa CoVid-19 crisis, economic recovery, West Philippine Sea, at iba pa.
“As I often stressed, the 2022 elections would be the most important elections in our nation’s history after 1986. Not only our Democracy is at stake, our very survival as a country is at stake, too,” aniya.
Giit ni Trillanes, hindi na kakayanin ng bansa na pamunuan pa ng isang Duterte sa susunod na anim na taon.
Si presidential daughter at Davao City Mayo Sara Duterte-Carpio ang nanguna umano sa ilang survey bilang pinili ng mga Pinoy na presidential candidate sa susunod na taon. (ROSE NOVENARIO)
