Kris tinalo ni Lugaw Queen

NADADAWIT pala si Kris Aquino sa mga huntahan sa palengke at sa mga neighborhood tungkol sa nagsisi nang “Lugaw Queen” na si Phez Raymundo.

Ilang araw din nga raw kasi na nag-viral (parang virus talaga!) si Lugaw Queen sa isang iglap. Ang ginawa lang n’ya ay nagdunong-dunungan sa pagdedeklarang hindi essential commodity ang lugaw. Idineklara n’ya ‘yon sa isang delivery man ng isang lugawan.

Kamakailan ay nagpa-video si Kris tungkol sa pagkasiphayo n’ya na lagi raw siyang naba-bash at laging kasama ang dalawang anak n’ya sa nilalait.

Nagpa-set up pa siya ng bonggang-bongga sa bahay n’ya para sa umano’y video expose n’yang ‘yon. Pinatambakan n’ya ng mamahaling mga dilaw na bulaklak ang isang bahagi ng bahay n’ya (na ang kabonggahan ay ihinalintulad sa mga set up ng interviews ng global talk show queen na si Oprah Winfrey), nagsuot siya ng dilaw ding damit, at nagpa-make up.

In fairness to Kris, ang ganda-ganda talaga n’ya sa pa-video n’ya na ‘yon.

Sadly for her, parang ‘di naman naging viral ‘yon. Wala naman kasing kahindik-hindik na bagay siyang ini-announce kundi lilipat na sila ni Bimby ng tirahan at hindi na sa Quezon City para ‘di na siya ma-link sa ex-boyfriend n’yang si ex-Quezon City Mayor Herbert Bautista.

Kung ang sinabi ni Kris na sa Batanes na sila lilipat mag-ina, baka nag-viral pa siya. O kaya ay sa Tawi-Tawi islands sa Mindanao.

Walang nag-Tiktok na panggagaya kay Kris. ‘Di gaya ng nangyari kay Lugaw Queen.

Oo nga pala, ‘di naman na-fire si Lugaw Queen bilang tanod sa Barangay Muson sa San Jose del Monte City.

KITANG-KITA KO
ni Danny Vibas