HATAW! D'yaryo ng Bayan hatawtabloid.com
ni ROSE NOVENARIO
UMALMA si dating Vice President Jejomar “Jojo” Binay sa pabago-bagong termino na ginagamit ng Inter-Agency Task Force (IATF) para ilihis ang unlimited lockdown bilang solusyon na tanging alam ng administrasyong Duterte laban sa CoVid-19 pandemic.
Ayon kay Binay, sa realidad ay lockdown ang ‘bubble’ na bagong terminong naimbento ng pamahalaan upang pagtakpan ang pagkabigo, kapabayaan, at kawalan ng kakayahan sa pagtugon laban sa CoVid-19.
Isang taon nang nararanasan ang pandemya sa buong mundo pero publiko ang sinisisi at itinuturong dahilan ng gobyerno kaya tumataas ang CoVid-19 cases sa bansa.
“What’s in a name? The so-called ‘bubble’ is in reality a lockdown. But government won’t call it a lockdown because it will be an admission of their failure, neglect, and incompetence. Blaming the people,” ani Binay sa kanyang tweet kahapon.
Habang sa homilya noong Linggo, hinamon ni Bishop Broderick Pabillo, Apostolic Administrator of Manila, ang sambayanang Filipino na palitan ang kasalukuyang pamamalakad sa bansa kung hindi karapat-dapat na maging kulelat ang Filipinas sa buong mundo sa pagharap sa CoVid-19 pandemic.
“Kontento na ba tayo sa pamamalakad sa ating bayan? Ito na ba ang ‘the best’ na mararating natin? Kung kontento na, ipagpatuloy na lang natin ang kasalukuyang namumuno.
“Kung naninaiwala tayo na hindi lang ito ang Filipinas, na hindi karapat-dapat na ganito tayo – parating kulelat…E ‘di palitan na natin ang kasalukuyang pamamalakad,” ani Pabillo.
Maging ang Alliance of Health Workers (AHW) ay nagtatanong kung saan napunta ang P785.96 bilyon o 16.2 bilyong US dollars total loans ng administrasyong Duterte upang labanan ang CoVid-19 dahil P55.82 bilyon o US$ 1.15 bbilyon lamang ang inilaan para sa hospital equipment, medical needs, at vaccination.
Nagtaka ang grupo kung bakit walang transparency kung paano ginasta ang mga pondo para sa Bayanihan 1 at 2 at sa isang taong pandemya ay limitado pa rin ang Personal Protective Equipment, kulang pa rin ang mga empleyado sa mga pagamutan at hindi tumitigil ang kaso ng CoVid-19 sa hanay ng health workers.
Nangako si Presidential Spokesman Harry Roque na sasagutin ngayong araw ang mga isyu.
Inihayag kamakalawa ng Palasyo na “NCR plus Bubble” ang Metro Manila, Bulacan, Cavite, Laguna, at Rizal na isinailalaim sa mas mahigpit na general community quarantine (GCQ) upang kontrolin ang paglobo ng kaso ng CoVid-19 sa bansa sa loob ng dalawang linggo, mula 22 Marso hanggang 4 Abril.
