HATAW! D'yaryo ng Bayan hatawtabloid.com
KOMPIYANSA ang Palasyo na walang doktor na magpapabayad o magpapagamit upang mameke ng medical certificate para palabasin na may comorbidity o may sakit ang kanyang pasyente para mapasama sa prayoridad na tuturukan ng CoVid-19 vaccine.
Ang mga taong may comorbidity ay may karamdamam tulad ng diabetes at sakit sa puso na nasa ikatlong grupong prayoridad na babakunahan kontra CoVid-19 base sa national vaccination program ng pamahalaan.
“Talagang napakainit po ng balitaktakan diyan, kasi nga may mga nagsasabi na kapag pinayagan iyong may comorbidities maraming mandaraya para lang mauna sa pila. Sabi ko naman, pagtiwalaan naman siguro ang ating mga doktor na mag-iisyu ng certificate na hindi naman sila magsisinungaling, dahil talaga namang mataas ang respeto natin sa ating mga doktor,” ani Presidential Spokesman Harry Roque sa panayam sa DZBB kahapon.
Ipinagmalaki ni Roque na ipinaglaban niyang mapasama sa mga prayoridad mabakunahan ang may comorbidity dahil madali silang mahawaan ng sakit gaya ng senior citizens.
“Talagang ipinaglaban ko po iyan, kasi alam naman natin na sang-ayon sa siyensiya hindi lang matatanda ang vulnerable dito sa sakit na ito, e kasama rin iyong mga may comorbidities,” dagdag niya.
Maaari rin aniyang maituring na kasama rin sa prayoridad bilang economic frontliners ang media dahil hindi nagsara ang mga media company noong ideklara ang enhanced community quarantine noong nakaraang taon.
“Ngayon sinasabi n’yo siguro ‘yung mga economic frontliners. Eto kasi ‘yung mga industriya na hindi sarado noong ECQ at kasama sa hindi sarado ang mga news. Naalala n’yo ECQ kayo bukas. So ang basa ko riyan, kasama rin kayo, talagang frontliners din kayo dahil umulan, umaraw, may CoVid o wala, tuloy ang inyong trabaho. Nakasulat po roon sa resolution lahat ng mga manggagawa sa industrya na binuksan o pinayagang magbukas habang may ECQ e kasama sa magkakaroon ng prayoridad,” giit ni Roque.
Unang mababakunahan aniya ang health workers mula sa Philippine General Hospital at iba pang referral hospitals, DOH hospitals, LGU hospitals at pribadong pagamutan.
(ROSE NOVENARIO)
