PWD minolestiya ng trike driver

ARESTADO ang 29-anyos trike driver makaraang molestiyahin ang dalagitang may kapansanan, kamakalawa ng gabi sa Makati City.

Inireklamo sa pulisya ang suspek na si Gerald Egot, ng Camiguin St., Barangay Pitogo, Makati City, ng sexual abuse in relation to Republic Act 7610 (Child Abuse Law).

Ayon sa ulat ng Makati City Police Station, nangyari ang pangmomolestiya sa biktimang si alyas Stephanie  sa loob ng tricycle na ipinarada sa Pinos St., Barangay Pinagkaisahan, Makati dakong 7:00 pm.

Sa kuwento ng 53-anyos ina ng biktima, ang anak niya na may multiple disability ay bumibili sa isang kalapit na tindahan nang lapitan ng suspek saka isinaman at isinakay sa tricycle.

Ipinarada umano ang tricycle sa madilim na bahagi  ng Pinos St., at doon pinaglalamas ang dibdib ng biktima hanggang sa ibabang bahagi.

Nalaman ng ina ang nangyari sa anak nang hanapin ito kaya agad ipinahuli ang suspek sa dalawang Bantay Bayan ng Brgy. Pitogo sa isinuko sa Women and Children Protection Desk ng Makati City Police. (JAJA GARCIA)