HATAW! D'yaryo ng Bayan hatawtabloid.com
INILATAG na ng pamahalaang lungsod ng Taguig ang 2021 recovery budget na nagkakahalaga ng P13.5 bilyon kasama rito ang bakuna kontra CoVid-19 na P1 bilyon.
Ipinaalalahanan din ang mamamayan na ang bakuna ay isa lamang parte ng programa upang sugpuin ang CoVid-19.
Sa ilalim ng P1-bilyon programang bakuna, sinisiguro na ang bawat mamamayan ng Taguig ay magkakaroon ng libreng bakuna.
“Simula pa lamang noong Setyembre, nagsimula na ang planning para sa pagbabakuna. Ito ay kasapi ng programa laban sa CoVid-19 na kinabibilangan ng mass testing at pagpapagaling sa mga may sakit,” ayon kay Mayor Lino Cayetano.
Dagdag ng alkalde, nais masiguro ng Taguig na ang libreng testing ay magpapatuloy sa 2021 sa 30 health centers at dalawang drive-thru location kaya naman tuloy ang pag-invest ng siyudad sa healthcare and treatment.
Ang sariling molecular laboratory and disease surveillance units ng Taguig ay magpapatuloy rin ng operasyon dahil kasama rin sa pondo ng 2021 ang kanilang pagsasagawa ng disease surveillance na importante upang masawata ang pagkalat ng CoVid sa kabila ng paglabas ng mga bakuna.
“Kami po ay nakikipag-ugnayan sa Joint Task Force at sa Department of Health para sa allotment ng vaccine para sa Taguig pero mayroon na rin pag-uusap sa mga supplier para sa sariling supply ng Taguig. Handa na rin ang Taguig na ilunsad ang model vaccine stations at ang citizens ID ngayong January. Pareho itong importante para sa kabuuan ng CoVid vaccine rollout plan,” dagdag ng Taguig mayor.
Siniguro ni Mayor Lino na maagang nakapaghanda ang siyudad para sa CoVid contingencies at pinaalalahanan ang bawat isa na ang vaccination ay importante ngunit isa lamang ito sa component ng laban kontra COVID.
“Kailangan natin maging mapagmatyag at responsable upang matapos na ang CoVid at ang pagkalat nito,” wika ni Mayor Lino.
Ang Taguig ang may pinakamababang kaso ng CoVid sa Metro Manila sa pagtatapos ng 2020 at inaasahan na tuloy ang pag-arangkada para sa new normal.
“Kailangan lang ng balance sa pagbubukas ng ekonomiya at ang pagbabalik ng tao sa kanilang trabaho at mga bata sa eskuwela dahil ito ang kasama sa plano ng Taguig sa taong 2021,” saad ni Mayor Lino.
