80-M Pinoy atat nang gumala (Sa tagal ng lockdown)

KAHIT kumakalat pa ang sakit na CoVid-19, mahigit 80 milyong Filipino ang gusto nang gumala sa mga tourist spots sa iba’t ibang dako ng bansa.

Sa pagharap sa pagdinig ng P3.5-bilyong budget ng  Department of Tourism (DOT) sinabi ni Secretary Berna Romulo-Puyat sa House committee on appropriations, 77 porsiyento ng mga Filipino ay ‘atat’ nang gumala.

“Based on our survey, 77 percent (Filipinos)  still want to travel even during CoVid-19 pandemic,” ani Romulo-Puyat.

Sa aktuwal na numero, ang 77 porsiyento ng kabuuang 110 milyong populasyon ng bansa, ay aabot sa 80 milyones.

Ani Romulo-Puyat, kahit gusto na ng mga Pinoy na pumunta sa tourist destinations, hindi pa maaaring buksan lahat dahil nananatili pa ang sakit na CoVid-19 sa bansa.

Isa sa mga bubuksan sa turista ang Boracay at isusunod ang Baguio para lamang sa mga residente ng Rehiyon 1.

“Lahat ng tourist destination gusto nang magbukas pero sila man ay nangangamba,” ayon kay Romulo-Puyat.

Umaasa si Romulo-Puyat na sa pagbukas ng lokal na turismo, makababawi ang sektor sa dinanas nitong kahirapan dulot ng CoVid-19.

Kaugnay nito, nanawagan si House committee on tourism chairperson at Laguna Rep. Sol Aragones sa taong bayan na tangkilikin ang lokal na industriya ng turismo bago bumiyahe sa labas ng bansa.

“Sa rami natin, kayang-kaya nating buhayin ang sariling tourism sector natin kaya mamasyal muna tayo sa sarili nating bayan bago sa ibang bansa,” ayon kay Aragones. (GERRY BALDO)