MNL48, sumabak sa int’l benefit concert ng UNICEF

TULOY-TULOY pa rin pala sa pagbabahagi ng kanilang talent ang MNL48. Katunayan nagkaroon sila ng isang international benefit concert para sa UNICEF kahapon. Nakasama nina Coleen Trinidad, Sheki Arzaga, at Abby Trinidad ng MNL48 ang iba pang Asian stars para sa One Love Asia, international benefit concert.

 

Ani Abby, “Sobrang saya po namin noong malaman naming magpe-perform po kami sa ‘One Love Asia.’ Isa pong privilege na makasama po ang sikat na Asian artists at i-represent ang bansa.”

 

Pinaghandaan talaga ng grupo ang concert na ito na bukod sa ibang Asian artist ay na-excite rin silang makasama ang iba pang grupo mula sa ibang bansa na kabilang sa AKB48.

 

“Naghanda po kami physically and mentally. Tiniyak naming makapagbibigay kami ng saya, bago, at nakai-inspire na performance.  Positive vibes at ngiti sa mga manonood din ang ibinahagi namin,” sambit naman ni Sheki.

 

Naging paraan din ang concert para makalikom ng pondo para sa mga bansang apektado ng Covid-19.

 

“Blessed po ang pakiramdam namin na gamitin ang talento namin para sa isang magandang hangarin ngayong may pandemic. Nakatutuwa na matulungan ang mga apektado ng heath crisis, lalo na ang mga bata,” pagbabahagi naman ni Coleen.

 

Ang One Love Asia ay handog ng YouTube at WebTVAsia. Mapapanood ito sa youtube.com/c/oneloveasia at onelove.asia.

 

Samantala, maaari pa ring bumoto ang fans sa gusto nilang maging bahagi ng MNL48 third generation sa MNL48 Third General Election. Para makaboto, pumunta lamang sa https://mnl48.hallohallo.com/ hanggang June 27 ng 9:00 p.m..

SHOWBIZ KONEK
ni Maricris Valdez Nicasio