Publiko, tutok ngayon sa telebisyon

DAHIL iwas muna ang mga tao na lumabas at pumunta sa matataong lugar dahil sa COVID-19 at sa community quarantine sa maraming lugar, halos karamihan ng mga tao ay nasa loob ng bahay at kundi nag-i-internet ay nanonood ng telebisyon.

Kaya tiyak na mas lalong tataas ang ratings ng mga programa sa TV, lalo na ang mga news programs para abangan ang mga latest updates na mga balita.

Aalagwa rin ang ratings ng mga teleserye dahil wala munang gustong manood ng sine sa takot na magkasakit.

Siyempre, highly-recommended namin ang dalawa sa nangungunang drama series ngayon, ang Magkaagaw na pinagbibidahan nina Sheryl Cruz, Jeric Gonzales, Klea Pineda, at Sunshine Dizon na napapanood sa GMA Afternoon Prime.

Ang isa pa ay ang Anak Ni Waray vs Anak Ni Biday na pinagbibidahan naman nina Barbie Forteza, Migo Adecer, at Kate Valdez at nina Snooky Serna at Dina Bonnevie.

Siyempre pa, bukod sa ikinatutuwa namin ang mas lalong tumataas na ratings ng mga TV shows ngayon, mas ikatutuwa namin na sana ay matapos na ang sumpa ng COVID-19 at manumbalik ang kalusugan at kaligtasan ng buong mundo, lalo na ng sambayanang Filipino.

Rated R
ni Rommel Gonzales