HATAW! D'yaryo ng Bayan hatawtabloid.com
“WALANG namamatay sa gutom. Ang isang buwan (pagkagutom) ay hindi pa nakamamatay.”
Ito ang buwelta ng Palasyo sa mga batikos laban sa ipinatutupad na isang-buwang lockdown sa National Capital Region (NCR) dahil posibleng mamamatay sa gutom ang masa at hindi sa kinatatakutang coronavirus disease (COVID-19).
Ayon kay Presidential Spokesman Salvador Panelo, hindi totoo na may namamatay sa gutom sa loob ng isang buwan.
May ginagawa na rin aniyang hakbang ang pamahalaan para matugunan ang pangangailangan ng mga manggagawa na maaaring maapektohan ang trabaho o hanapbuhay dahil sa community quarantine.
Nakaantabay na umano ang Department of Social Welfare and Development (DSWD) para sa 300,000 food pack na handang ipamahagi sa mga magugutom o maaapektohan ng community quarantine.
Pero hindi kusang ipamamahagi ng DSWD ang ayudang pagkain sa mga pamayanan. Kailangan umanong may makaabot sa kanilang reklamo o hinaing bago nila ipamudmod ang food packs.
“Ang DSW… kapag nakarinig… siyempre may magrereklamo. Makaaabot iyan. Kayo kapag nakadinig kayo. Ano ba ang ginagawa ninyo? Siyempre ipaparating n’yo kaagad. By word of mouth. makakarating sa atin iyan,” ani Panelo.
Kaugnay nito, tiniyak nina Panelo at Department of Science and Technology (DOST) Secretary Fortunato dela Peña na may sapat na pondo ang pamahalaan para sa produksiyon ng COVID-19 test kits.
“We wish to assure our countrymen that the Office of the President is providing the needed funds of the DOH, DOST and UP Manila’s National Institutes of Health in the production of the diagnostic kits for the COVID 19 tests,” ayon sa kanilang joint statement.
Nakahanda anila ang Manila Healthtek para sa malakihang produksyon upang makatugon sa kasalukuyang krisis.
Samantala, ikinagalak ng Palasyo na negatibo ang resulta ng Covid-19 test nina Executive Secretary Salvador Medialdea, Finance Secretary Carlos Dominguez, Transportation Secretary Arthur Tugade, at Public Works Secretary Mark Villar.
ni ROSE NOVENARIO
