HATAW! D'yaryo ng Bayan hatawtabloid.com
DALAWANG miyembro ng gabinete ang iniimbestigahan ng Presidential Anti-Corruption Commission (PACC) dahil sa umano’y pagkakasangkot sa katiwalian.
Ayon kay PACC commissioner Greco Belgica, matatapos sa Oktubre ang kanilang pagsisiyasat sa dalawang cabinet members na hindi niya pinangalanan.
Isusumite aniya ng PACC kay Pangulong Rodrigo Duterte ang resulta ng imbestigasyon at kung kinakailangan ay irerekomenda nila sa Ombudsman na sampahan ng kaso.
Umabot aniya sa 40 ang inirekomenda nila sa Ombudsman na sampahan ng kaso habang wala pang 100 ang sinibak ng Pangulo sa puwesto base sa kanilang rekomendasyon.
Lifestyle check sa PCSO official matatapos sa Nobyembre
MATATAPOS sa Nobyembre ang lifestyle check na isinasagawa ng Presidential Anti-Corruption Commission (PACC) sa 15 opisyal ng Philippine Charity Sweepstakes Office (PCSO).
Sinabi ni PACC Commissioner Greco Belgica na kasama sa iniimbestigahan sina dating PCSO general manager Alex Balutan at board member Sandra Cam.
Isinumite aniya ni PCSO general manager Royina Garma ang kopya ng statement of assets, liabilities and net worth (SALN) ng 15 opisyal ng PCSO sa tanggapan ng PACC.
“She (Garma) submitted 15 SALNs and in the course of the discussion, narinig po namin iyong iba pang mga issues sa mga palaro, mga kulang na pagsusumite ng intrega sa gobyerno, issues ng kontrata, issues ng violations ng IRR (Implementing Rules and Regulations),” ani Belgica.
Matatandaan na ipinatigil ni Pangulong Rodrigo Duterte ang operasyon ng lotto, small town lottery, keno at peryahan ng bayan dahil sa “massive corruption.”
Makaraan ang tatlong araw ay ipinatuloy ng Pangulo ang operasyon ng lotto dahil hindi aniya ito kasama sa nabahiran ng korupsiyon.
(ROSE NOVENARIO)
