Career nina James at Nadine, parang binuhusan ng malamig na tubig

EWAN pero parang binuhusan ng malamig na tubig ang career nina James Reid at Nadine Lustre. Noong araw, sila ang matinding katapat niyong KathNiel at sinasabing neck to neck ang labanan nila. Naging best seller pa ang isang librong sila ang laman. Pero pagkatapos niyon unti-unti na yatang nawala ang dalawa.

Ang huli naming narinig, nag-celebrate sila ng kanilang third anniversary kamakailan lang bilang totoong mag-syota. Ang kanilang huling pelikula ay iyong Better Not Love You, na inilabas noon pang nakaraang taon at hindi na nasundan. Naging kontrobersiyal pa iyon dahil sa sinasabing “naging problema ng kanilang director.” Pagkatapos niyon, isang concert na lang ang kanilang ginawa, na hindi rin naman masasabing ganoon kalaki.

Iyong huli nilang serye sa telebisyon ay natapos na noon pang 2017. Hindi na rin nasundan iyon. Sinasabi noong una na kulang sila sa panahon para sa isang serye. Tapos sinasabi naman na inihahanap na sila ng magandang project na mukhang hindi na matagpuan.

Ano nga ba ang problema ng JaDine?

Una, sinasabing ang kanilang popularidad ay naapektuhan ng biglang popularidad noon ng AlDub. Pagkatapos naman niyon, marami nang nabuong iba pang love teams. Mukhang totoo naman na nagkaroon ng problema iyang JaDine dahil sa mga sunod-sunod na reklamo rin sa kanila noon. Hanggang sa tuluyan na ngang kumawala ang popularidad ng KathNiel at naiwan na silang lahat.

Sinasabi ring siguro nawala na rin ang excitement sa kanila dahil sa kanilang maagang pag-amin na magsyota na nga sila, at sa mga usapan noon na nagli-live in na sila. Alam naman ninyo ang fans, nagagalit basta hindi nagkatuluyan ang gusto nilang love team, pero basta naman natuluyan na nagsasawa na rin sila agad.

Kapansin-pansin din na tumaba na si James, nag-mature masyado ang hitsura. Hindi na siya cute.

HATAWAN
ni Ed de Leon