HATAW! D'yaryo ng Bayan hatawtabloid.com
DALAWANG dump truck ang binili ng Pamahalaang Lungsod ng Navotas at pinabasbasan noong Lunes ng umaga. Kayang humakot ng nasabing mga truck ng 8.8 cubic meters ng basura.
Sinabi ni Mayor John Rey Tiangco, kailangan ang dagdag na mga truck para maging episyente ang pangongolekta ng basura ng City Environment and Natural Resources Office (CENRO).
Sa kasalukuyan, may 13 dump trucks na ang lungsod na nangongolekta ng mga basurang patapon mula sa 18 barangay.
Mula Enero hanggang Hunyo ngayong taon, nakakolekta ang CENRO ng 147,224.61 cubic meters ng basura, 97,940.80 cubic meters nito ay dinala sa Navotas sanitary landfill. Ang iba ay iniresiklo o ginawang compost.
Ang Navotas ang nag-iisang lungsod sa Metro Manila na may sariling landfill. Noong 2017, kumita ang pamahalaang lokal nang hindi kukulangin sa P30 milyon sa tipping fees.
Noong nakaraang linggo, lumahok ang Navotas sa Waste Assessment and Brand Audit, na pinangunahan ng Mother Earth Foundation, na naglalayong ituro sa mga Navoteño ang halaga ng pagbubukod ng mga basura sa bahay.
May memorandum of agreement ang Navotas sa Mother Earth para sa implementasyon ng Ecological Solid Waste Management Program.
Nakipag-partner din ang lungsod sa Caritas Kalookan at Catholic Relief Services para maisagawa ang Municipal Waste Recycling Program sa apat na mga barangay, kabilang na ang Daanghari, San Jose, San Roque at Tangos South. (JUN DAVID)
