HATAW! D'yaryo ng Bayan hatawtabloid.com
BUKAS ay isang taon na sa panunungkulan bilang pangulo ng bansa ang dating alkalde ng Davao City na si Rodrigo “Digong” Duterte.
Sa isang taon niya sa Malacañang masasabi natin na naging matagumpay ang kampanya niya laban sa ilegal na droga, ang pangunahing programa na inilatag niya noon pa mang nangangampanya pa lamang siya sa pagkapangulo.
Marami man ang pumupuna at hindi natutuwa sa ginawa niyang maigting na kampanya kontra ilegal na droga, kabilang ang mga kalaban sa politika, ang human rights advocates at mga dayuhang grupo, higit na marami naman ang nasisiyahan sa ginawa ni Duterte.
Kahit sinong mga magulang man ang tanungin, na noon ay natatakot para sa kanilang mga anak, naniniwala sila na mas ligtas na ngayon ang mga lansangan kompara noong mataas ang bentahan ng shabu sa kalye at naglipana ang mga drug pusher at user.
Dito lang sa Metro Manila, sinasabing 2.7 porsiyento o 47 ng 1,706 barangay rito ang drug-free na dahil sa maigting na Oplan Tokhang 1 at 2. Nasa 3,151 drug suspects ang napatay sa mga police operations at libo-libo ring sangkot sa ilegal na droga ang nagsisuko na.
Hindi man masabi na matagumpay si Duterte sa maraming aspekto ng kanyang panunungkulan, ang kanyang kampanya laban sa droga na pangunahing programa ng kanyang administrasyon, hindi maitatanggi na siya ay tunay na nagwagi rito.
