Duterte bumalik sa peace talks

NAGBAGO ang isip ni Pangulong Rodrigo Duterte na ibasura ang peace talks, at tiniyak na magkakaroon ng estratehikong pagbabago sa landas tungo sa kapayapaan sa pagitan ng pamahalaan at kilusang komunista sa panahon ng kanyang administrasyon.

Ito ang resulta ng pulong ni Pangulong Duterte sa National Democratic Front (NDF) – recommended cabinet members na sina Social Welfare Secretary Judy Taguiwalo, Agrarian Reform Secretary Rafael Mariano at National Anti Povert Commission (NAPC) chief Liza Maza sa Malacañang kamakalawa ng gabi.

Sinabi ni Presidential Adviser on the Peace Process Jesus Dureza, nagbigay ng mga espesipikong utos si Pangulong Duterte, kasama ang mga posibleng susunod na hakbang matapos kanselahin ang peace talks at unilateral ceasefire.

“He gave specific instructions on how to deal with the present situation, including possible next steps following the cancellation of peace talks and the unilateral ceasefire declarations. He lamented that the almost 50-year old insurgency and conflict still continue to this day and vowed to work for a strategic shift during his incumbency,” ani Dureza.

Umabot aniya nang dis-oras ng gabi ang kanilang meeting sa pagtalakay sa mga direksiyon at mga susunod na hakbang sa negosasyong sa Communist Party of the Philippines-New People’s Army at NDFP.

“The President reiterated his desire and passion of bringing about just, lasting, and inclusive peace in the land,” ani Dureza.

Noong Linggo ay inihayag ng CPP, na maaari nang umusad ang negosasyon para sa pagbalangkas ng bilateral ceasefire agreement ng gobyerno at NDFP, na nakatakda sa 22-27 Pebrero sa Netherlands kapag nagpasya si Pangulong  Duterte na ipadala ang negotiating panel at mga emisaryo.

Upang matiyak, anang CPP, ang tagumpay ng mga negosasyon, puwedeng umayuda ang gobyerno para makadalo ang mga miyembro ng NDFP ceasefire committee at consultants.

Muling susuporta, anang CPP, ang partido at ang NPA sa mga pagsusumikap para mapirmahan ang bilateral ceasefire agreement.

Sinabi ng CPP, naengganyo ang mga rebolusyonaryo sa mga nakaraang pahayag ni Duterte, na palalayain ang lahat ng political prisoners sa loob ng 48 oras, kapag nalagdaan ang bilateral ceasefire agreement.

ni ROSE NOVENARIO