Baguhang actor, may attitude na, ‘di pa marunong tumulong sa mga kapatid

NOONG baguhan pa ang young actor na ito ay nakitaan na siya ng mga co-star niya ng ‘attitude’. Napapailing na lang ang mga senior star sa kanya dahil kahit ang taga-timpla ng kape sa set ay sinisigawan daw ng aktor.

Hindi nga raw siya kinibo ng ilang buwan ng bida sa serye dahil sa maling trato niya sa maliliit na staff.

Kulang din siya sa sa sincerity noong makipagrelasyon ito kaya minus point na naman siya sa netizens. Parang ginamit pa niya ang isang TV show sa pakikipag-closure sa GF para magkaroon ng exposure sa telebisyon.

Mabagal din ang pag-angat niya dahil hindi kagandahan ang asal niya.

Bagamat kumikita na siya, hinayaan niyang walang pambayad sa tuition fee ang mga kapatid niya. Pinabayaan na raw niyang huminto sa pag-aaral ang mga ito.

Bagamat responsibilidad ng ama nila na pag-aralin ang mga kapatid niya, wala raw ngayong pinagkakakitaan at nagkasakit pa dahil sa stress.

Mas focus daw ang oras at atensiyon ng young actor sa lovelife niya kaysa kapakanan ng pamilya niya. Hindi siya gaya ng mga sikat nating mga young actor na mababait at tinutulungan ang mga kapatid kaya naman lalong bumobongga ang career.

(Roldan Castro)