Kapatid ni Aljur, tumigil sa pag-aaral para makasali sa Pinoy BoyBand Superstar

BAKIT hindi boses ang inuna ng production ng Pinoy Boyband Superstar at sumunod na lang ang mukha noong pumila ang mga ito sa audition?

Nakakaloka kasi na guwapo nga pero salat naman sa boses kaya napapahiya lang sila ‘pag humarap sa judges gaya nina Aga Muhlach, Sandara Park, Vice Ganda, at Yeng Constantino.

Gaya na lang ang nakababatang kapatid nina Aljur at Vin Abrenica na si Allen, may sabit ang boses kaya naligwak sa judges. Bagamat maganda ang boses ng tatay nila at ni Aljur, hindi namana ‘yun ni Allen. Kailangan pa niyang i-improve ang boses niya. Ang nakakaloka lang, tumigil daw siya sa pag-aaral dahil feeling niya ito na ang calling niya. Bakit kasi hindi muna gawing priority ang pag-aaral lalo’t may pampaaral naman sa kanya ang pamilya niya?

Ganoon din ang nangyari sa anak ni Marco Sison. Nandoon pa naman si Marco na sumuporta sa anak pero bagsak din dahil salat ang boses. Hindi man lang napantayan o nahigitan ang kanta ng kanyang ama. Bakit hindi muna tinuruang mabuti ni Marco ang anak bago isinali sa Pinoy Boyband? Nakasalalay pa naman ang pangalan niya bilang magaling na mang-aawit.

Anyway, super pasok naman sa banga ‘yung contestant  na nagngangalang Jimsen Jison ng Marikina City. Panalo ang bagets. Guwapo na, may talent pa.

‘Yun na!

TALBOG – Roldan Castro