HATAW! D'yaryo ng Bayan hatawtabloid.com
PAMILYAR ang mukha si self-confessed Davao Death Squad (DDS) member Edgar Matobato Malacañang Complex sa JP Laurel St., San Miguel, Maynila noong administrasyong Aquino.
Ito ang nabatid ng Hataw sa isang source na tumangging magpabanggit ng pangalan.
Aniya, nakikita si Matobato sa parking area sa tapat ng San Miguel Church sa Malacañang Complex noong Aquino administration.
May pagkamaangas aniya si Matobato kaya siya natandaan na naging “frequent visitor” sa Malacañang Complex.
Malapit umano sa Bahay Ugnayan tumatambay si Matobato kapag nakikita siya sa nasabing erya.
Noong administrasyong Aquino ay matatagpuan ang tanggapan ng EDSA People Power Commission sa Bahay Ugnayan na pinamunuan nina Director Maria Montelibano at Commissioner Emily Abrera.
Matatandaan, sumikat si Matobato nang iharap bilang star witness ni Sen. Leila de Lima sa pagdinig ng Senado sa nagaganap na extrajudicial killings sa bansa.
Bago siya lumantad sa Senado ay inilako umano ng isang ex-Palace reporter ang “exclusive scripted video” ni Matobato sa isang photographer ng New York Times.
Ang ex-Palace reporter umano ang nagsilbing director ng “exclusive scripted video”ni Matobato na gusto nilang mabuyangyang sa international media ang mga hinabing kasinungalingan laban sa gobyernong Duterte.
Kapalit umano ng malaking halaga ay nagkasundo ang photographer at ex-Palace reporter na linlangin ang editors ng NY Times at pinalabas sa kanila na interview ito ng isang “stringer” kay Matobato, pero ang totoo ay kasado na ang question and answer.
Sinabing na “drug money” ang ginastos ng kampo ng isang lady narco solon para siraan ang Pangulong Duterte makaraan ibuko na sabit sa operasyon ng illegal drugs.
Nabisto umano ng NYT na ‘kinoryente’ sila ng kontak sa Filipinas sa video ni Matobato kaya nagpadala ng tauhan sa bansa para imbestigahan ang pangyayari.
( ROSE NOVENARIO )
