HATAW! D'yaryo ng Bayan hatawtabloid.com
SAGOT ng Royal Norwegian Government (RNG) ang lahat ng gastusin ng mga kinatawan ng Communist Party of the Philippines-New People’s Army – National Democratic Front (CPP-NPA-NDF) sa paglahok nila sa peace talks sa Oslo, Norway.
Sinabi ni dating Bayan Muna representative at NDF panel member Satur Ocampo bilang third party facilitator, ang RNG ang gagasta para sa transportation at accommodation ng mahigit 20 NDF consultants na kasali sa peace talks.
“Ang piyansang ilalagak sa hukuman para sa paglaya ng NDF consultants ay pagtutulungan ng human rights groups at kani-kanilang pamilya,” ani Ocampo.
Hanggang kahapon, abala ang human rights groups at government lawyers sa pag-aasikaso sa pagpapalaya ng mga detenidong NDF consultants gaya ng mag-asawang Benito at Wilma Tiamzon, Tirso Alcantara, Alan Jasminez, Ernesto Lorenzo, at Renanta Gamara.
Isinusulat ang balitang ito, pinalaya na sina Alcantara, Jasminez, Lorenzo, at Gamara.
Isang senyales umano na gumaganda ang panahon para sa peace talks ayon sa NDF.
Naudlot ang itinakdang press conference ng Karapatan human rights group kahapon ng umaga para sana sa NDF consultants ngunit hindi natapos ang dokumento sa iba’t ibang hukuman.
Inaasikaso rin ng ilan sa panellist na matanggal ang kanilang mga pangalan sa hold departure order (HDO) sa Bureau of Immigration para makabiyahe patungong Oslo bago magsimula ang peace talks sa Agosto 20.
Kasama sa mga inaasahang makakasama sa peace talks at protektado ng Joint Agreement on Safety and Immunity Guarantees (JASIG) sina Concha Araneta Bocala, Adelberto Silva, Ruben Saluta, Jaime Soledad, Kennedy Bangibang, Loida Magpatoc, Reynante Gamara, Alfredo Mapano, Emeterio Antalan, Leopoldo Caloza, Eduardo Sarmiento, Ernesto Lorenzo, Pedro Codaste, Porferio Tuna, Eduardo Genelsa, Ariel Arbitrario, Renato Baleros, Sr. at Edgardo Friginal.
Ikinatuwa ng Palasyo ang pahayag ng pasasalamat ni CPP founding chairman Jose Ma. Sison kay Pangulong Rodrigo Duterte hinggil sa pagpapalaya sa NDF consultants at matibay nilang pagkakaibigan.
Tiniyak ni Communications Secretary Martin Andanar na magiging transparent ang Pangulo sa mga magiging kaganapan sa peace talks kahit na malapit siya kay Sison.
( ROSE NOVENARIO )
