HATAW! D'yaryo ng Bayan hatawtabloid.com
IBUBUNYAG na ni Pangulong Rodrigo Duterte ang 27 local executives na sangkot sa illegal drug trade sa bansa, ayon kay Presidential Legal Adviser Salvador Panelo.
Sinabi ni Sec. Panelo sa Malacañang reporters kahapon, plano na ni Pangulong Duterte na ibulgar ang pangalan ng 27 local executives na sangkot sa illegal drugs sa bansa.
Aniya, kinompirma sa cabinet meeting kamakalawa sa Malacañang ni Pangulong Duterte, nasa 27 local executives ang nakalista na may kinalaman sa drug syndicate sa bansa.
Gayonman, tumanggi si Atty. Panelo na magbigay ng ano mang ‘hint’ kung sino-sino ang local executives na binabanggit ni Pangulong Duterte na mayroong ‘link sa illegal drugs.
Hindi niya itinanggi o kinompirma kung kasama sa kanila si Manila Mayor Joseph Estrada nang tanungin ng isang taga-media.
Pero sumagot siya: “My God you will be shocked!”
“Hintayin na lamang ninyo na mismong si Pangulong Duterte ang magbanggit nito. Ang sabi niya, baka ngayong gabi o bukas na niya ibulgar ang mga pangalan,” dagdag ni Panelo.
“Basta ang sabi ni Pangulo, may kakilala siya sa nasa listahan pero handa niyang pangalanan para sa kapakanan ng taongbayan dahil sinisira ng illegal drugs ang kinabukasan ng mamamayan,” paliwanag ng chief presidential legal counsel sa Palace reporters.
( ROSE NOVENARIO )
