2 sundalo sugatan sa pagsabog ng IED sa Bukidnon

CAGAYAN DE ORO CITY – Sugatan ang dalawang sundalo ng 41st Division Reconnnaissance Company sa ilalim ng 8th Infantry Battalion ng Philippine Army sa Bukidnon, nang masabugan ng improvised explosive device (IED) na itinanim ng rebeldeng New People’s Army (NPA) sa Brgy. Halapitan, San Fernando kamakalawa.

Sinabi ni 8th IB commanding officer, Lt. Col Lennon Babilonia, unang nakasagupa ng kanilang puwersa ang nasa 20 kasapi nang tinaguriang guerilla front 6 ng North Central Mindanao Regional Committee.

Napaatras ang mga rebelde bitbit ang kanilang sugatang kasamahan kaya tinugis sila ng mga sundalo.

Ngunit naapakan ng mga sundalo ang itinanim na IED ng mga rebelde kaya dalawa sa kanila ang sugatan.

Bukod dito, pinaulanan din ng mga rebelde ng mga bala ang sinasakyang ambulansiya ng mga sugatang sundalo habang inililipat sa Camp Evangelista Station Hospital sa Cagayan de Oro City.