HATAW! D'yaryo ng Bayan hatawtabloid.com
ISA na namang kakaibang putahe ng pagmamahal ang handog ng Regal Entertainment sa hugot comedy ng taon, ang That Thing Called Tanga Na na mapapanood sa Agosto 10, mula sa direksiyon ni Joel Lamangan at pagbibidahan nina Eric Quizon, Billy Crawford, Kean Cipriano, Martin Escudero, at Angeline Quinto.
Ang That Thing Called Tanga Na ay ukol sa kuwento ng limang magkakaibigan—apat na bading at isang babae na pumasok sa kakaibang relasyon at sakripisyo para matagpuan ang true love.
Hindi lang hugot, kabaliwan, at katangahan ang buhos ng emosyon nina Eric, Billy, Kean, Martin, at Angeline ang makikita sa pelikula. Ani Lamangan, ”Martin is a very good actor. I’ve handled him before sa TV. First time kong idirehe si Kean. Dedicated siyang actor. Walang hang up si Billy kahit lalaki siya. Eric is always competent. Si Angeline, ang galing ng timing sa comedy. May ritmo siya!”
Sinasabing marami ang makare-relate sa pelikula dahil nariyan ang martir sa lalaki, Miss Bahamas (read bumabaha) pagdating sa material na regalo sa boyfriend, pagkakaroon ng extended family kapag may babaeng asawa ang lalaking minamahal, mas gustong pumatol ang boyfriend sa babae kaysa bading, pakikipag-kumpare sa BF, gustong magkaroon ng anak kahit walang matres, at marami pang iba.
Subalit iisa lang ang puntong nais iparating ng TTCTN—lahat ay pantay-pantay pagdating sa pag-ibig. Diretso man ang kasarian o bading ang isang umiibig, dumarating ang puntong dahil sa pag-ibig, nawawala ang intelihensiya ng tao at naiiwan ang IQ sa bahay.
Sinabi pa ni direk Lamangan, ”Mahusay silang lahat. Nakatatawa. Makaa-identify ang lahat sa movie kahit bading. Universal ang approach namin sa pelikula.”
Mapapanood ang full trailer ng That Thing Called Tanga Na sa official Youtube channel ng Regal Films at sa kanilang Facebook Page na Regal Entertainment Inc..
SHOWBIZ KONEK – Maricris Valdez Nicasio
