HATAW! D'yaryo ng Bayan hatawtabloid.com
PUMALO sa record-high ang trust rating ni Pangulong Rodrigo Duterte ngayong buwan ng Hulyo.
Batay sa survey ng Pulse Asia na isinagawa noong Hulyo 2-8, siyam sa bawat 10 Filipino ang nagtitiwala kay Pangulong Duterte o 91 porsiyentong trust rating.
Ang face-to-face interview ng Pulse Asia sa 1,200 respondents sa iba’t ibang panig ng bansa ay isinagawa noong panahong pinangalanan ng Pangulo ang limang heneral na isinasangkot sa ilegal na droga.
Nasa 97 porsiyentong trust rating ang nakuha ng Pangulo sa Mindanao, sinundan ng NCR na 92 porsiyento habang parehong 89 porsiyento sa Visayas at balance of Luzon.
Sa naturang survey, nakakuha ng 62 porsiyentong trust rating si Vice President Leni Robredo.
Habang nakakuha ng 35 porsiyentog trust rating si Chief Justice Maria Lourdes Sereno sa kaparehong survey ng Pulse Asia.
PALASYO NAGPASALAMAT
NAGPASALAMAT ang Malacañang sa lubos na suporta ng sambayanang Filipino sa liderato ni Pangulong Rodrigo Duterte.
Ito ang pahayag ni Communications Secretary Martin Andanar makaraan ilabas ng Pulse Asia ang resulta ng kanilang survey na siyam sa sampung Filipino ang nagtitiwala kay Pangulong Duterte.
“This expression of confidence, therefore, shall serve as an inspiration to Duterte administration to continuously make a real difference to make our people’s lives better, safer, and healthier,” sabi ni Andanar.
Base sa Pulse Asia survey, pumalo sa 91 porsiyento ang nagtiwala kay Pangulong duterte.
Isinagawa ang survey sa pagitan ng Hulyo 2-8 sa 1,200 respondents noong panahong isiniwalat ni Pangulong Duterte ang limang narco generals.
Habang umabot sa walong porsyento ang hindi pa makapagdesisyon at 0.2 porsiyento ang nagpahayag ng kawalan ng tiwala sa pangulo .
Pinakamataas na nagtiwala sa Pangulo ang Mindanao sa 97 porsiyento, sinundan ng National Capital Region, 92 porsyento, habang ang Luzon at Visayas parehong 89 porsiyento.
( ROSE NOVENARIO )
