HATAW! D'yaryo ng Bayan hatawtabloid.com
TUGUEGARAO CITY – Patay ang dalawa katao habang sugatan ang 23 iba pa sa pagbangga ng isang pampasaherong jeep sa barikada ng DPWH sa bayan ng Pudtul, Apayao kamakalawa.
Ang mga namatay ay nasa top load ng nasabing sasakyan na sina Abraham Pedronan at Arthur Masalay, kapwa residente ng Luna, Apayao.
Batay sa imbestigasyon ng PNP, hindi kumagat ang preno ng sasakyan nang nasa pababang kalsada kaya nawalan ng kontrol sa manibela ang driver na si Eligah Yague na naging sanhi nang pagtagilid ng sasakyan.
Sinasabing tumilapon ang mga nasa top load ng sasakyan.
Napag-alaman, papunta sa kasal ang mga sakay ng jeep sa Pudtul mula sa bayan ng Luna.
Isa sa mga namatay, si Pedronan ay ama ng ikakasal na lalaki.
Sa kabila ng insidente ay natuloy pa rin ang kasal.
Samantala, ang ilang sugatan ay dahil sa pagkakapaso sa mga dala nilang pagkain na dadalhin sana sa handaan para sa kasal.
