Mag-ina ng seaman kinatay ng kaanak

TADTAD nang saksak at wala nang buhay nang matagpuan ang 51-anyos ginang at 14-anyos niyang anak na dalagita kahapon ng umaga sa Caloocan City.

Kinilala ni Caloocan City Police chief, Sr. Supt. Johnson Almazan ang mga biktimang sina Carol Suizo, 51, natagpuan sa ground floor ng two-storey nilang bahay sa Champaca St., Sampaguita Village, Brgy. 175 ng nasabing lungsod. Habang ang anak niyang si Angel, 14, ay natagpuan sa loob ng silid sa ikalawang palapag.

Ayon kay PO3 Alcee Jumaquio, ang bangkay ng dalawang biktima ay natagpuang halos naaagnas na ng kanilang kaanak na si Aikee Nario, 28, ng 67 Marganto St., Brgy. Gulod, Quezon City dakong 11:00 a.m.

Nauna rito, nakatanggap ng tawag si Nario mula sa kanyang pinsan na si Edwin Suizo, asawa ni Carol, seaman, at nakiusap na bisitahin ang kanyang mag-ina sa kanilang bahay dahil hindi sumasagot sa kanyang mga tawag.

Sa salaysay ni Aikee at ng kanyang amang si Raul Nario sa mga imbestigador, ang huling bumisita sa bahay ng mag-ina ay isa nilang kaanak na si Ryan Vitanzos

Si Vitanzos ay sinasabing problemado sa pera mula pa noong nakaraang taon kaya nanghihiram ng pera sa tiyahin na si Carol.

Ngunit tumanggi ang ginang dahil batid niyang sangkot sa illegal drug activities ang pamangkin.

Tinutugis na ng mga awtoridad ang nasabing suspek.