Diskusyon sa Federalismo paiigtingin ng PDP-Laban

LALONG paiigtingin ng Partido Demokratiko Pilipino-Lakas ng Bayan (PDP-Laban) ang pagpapaunawa sa mga mamamayan sa Federalismo sa anim na Round-Table Discussion (RTD) na magsisimula sa Agosto 4 sa Executive House, University of the Philippines sa Diliman, Quezon City.

Ayon kay PDP-Laban Policy Study Group Head Jose Antonio Goitia, lalahok sa diskusyon o RTD ang kinatawan ng mga bansang may karanasan sa Federalismo tulad ng Switzerland at Germany sa Agosto 4 na tatalakayin ang layunin ng matagumpay na sistema ng gobyerno tulad ng desentralisasyon, epektibo at episyenteng pagkakaloob ng serbisyo at makatuwiran at pantay na hatian sa kayamanan ng bawat estado.

Ani Goitia, chairman din ng PDP-Laban Membership Committee National Capital Region Council, lalahok din sa mga susunod na RTD ang mga kinatawan ng United States at Spain (Agosto 18), Canada at Australia (Setyembre 8), Malaysia at India (Seyembre 22), Brazil, Mexico, Argentina, at Venezuela (Oktubre 6 October) at South Africa, Ethiopia, at Nigeria (Oktubre 27).

Idiniin ni PDP-Laban NCR Council President Abbin Dalhani na mahalagang maipaliwanag ang karanasan sa Federalismo ng nasabing mga bansa lalo sa punto ng representasyon sa epektibong pagpili ng mga lider at mabuting pamamahala at administrasyon para maiwasan ang korupsiyon.

Tinukoy din ni Dalhani ang mga posibleng maging estado sa ilalim ng pamahalaang Federal tulad ng Northern Luzon, Central Luzon, Visayas, Davao Gulf, ARMM, Sulu at Tawi-tawi at National Capitol Region.