Joj at Jai, nag-agawan sa isang lalaki

ANG lalaki sa pagitan.

Ito ang kuwentong sasalangan ng tunay na kambal na sina Joj at Jai Agpangan ngayong Sabado, July 9, na episode ng MMK (Maalaala Mo Kaya). Na magmamahal sila sa iisang lalaki.

Si June (Jai) at Jess (Joj) ay ang perpektong halimbawa ng kambal, hindi lang dahil sila ay magkamukha kundi iisa rin ang ugali nila. Pareho ng gupit, pareho ng panlasa sa pananamit, hanggang sa paghahati sa mga personal na bagay, hindi talaga mapagbukod ang dalawa.

Matibay ang samahan ng magkapatid pero hindi nila akalain na susubukin pala ito sa pag-aaral nila sa kolehiyo. Makikilala ni Jess si Luis (Ronnie Alonte) at mai-in-love sa kanya. Nag-aalangan si June kay Luis sa simula kung kaya’t mahigpit niyang binantayan ito pero naging malapit din sila sa isa’t isa kalaunan.

Sa hindi inaasahang pangyayari, aaminin ni Luis kay June na siya pala ang tunay nitong mahal at may plano pang iwanan ang kakambal niyang si Jess para sila ay magkasama.

Bibigay kaya si June sa kaniyang nararamdaman para kay Luis? Matatanggap kaya ni Jess na siya ay iiwan ni Luis para sa sarili niyang kapatid?

Kasama sa nasabing episode sina Anna Capri, Smokey Manaloto, MicahMunoz, Matet de Leon, at CJ Navato, sa ilalim ng direksiyon ni Raz De La Torre at panulat ni Benson Logronio. Ang MMK ay pinamumunuan ng business unit head nito na si Malou Santos.

Samahan ang MMK sa paggawa ng mas maganda pang mga alaala sa ika-25 anibersaryo nito at bisitahin ang mmk.abs-cbn.com. Huwag din itong palampasin tuwing Sabado ng gabi sa ABS-CBN ABS-CBN o ABS-CBN HD (SkyCable ch 167). Panoorin ng libre ang latest episodes nito sa  wantv.com.ph oskyondemand.com.ph  para sa Sky subscribers.

HARDTALK – Pilar Mateo