HATAW! D'yaryo ng Bayan hatawtabloid.com
NAGSUMITE na si Cebu Rep. Gwendolyn Garcia ng panukalang batas na nagtatakda ng parameters sa paghahalal ng delegado sa constitutional convention at rules of procedure para sa operasyon ng Concon para sa pagbabago ng saligang batas.
Sa ilalim ng House Bill 312 ni Garcia, itinatakda na 107 ang delegadong ihahalal para bumuo ng Concon at ang kuwalipikasyon ay katulad sa inihahalal na kongresista.
Kung maaaprubahan ito, ang eleksiyon para sa Concon delegates ay gaganapin sa ikalawang Lunes ng Enero 2017 at mano-mano ang sistema ng halalan.
Para sa National Capital Region, 13 ang magiging delegado; lima sa Ilocos region; 11 sa Central Luzon, lima sa Western Visayas; apat para sa Zamboanga Peninsula; at lima para sa Soksargen area.
Pagkatapos ng eleksiyon, ang Concon ay magko-convene para sa opening session sa unang Lunes ng Marso 2017, dakong 10:00 am sa session hall ng Kamara.
Ang senate president at speaker of the house ang magkasabay na magbubukas ng opening session bago ihalal ang presidente ng lupon.
Ang Concon ang lilikha ng sarili nitong mga komite at bubuo ng sariling rules pati na ang paghahanda ng sariling budget para sa operasyon ukol sa charter change.
Aabot sa P300 milyon ang ipanunukalang pondo para sa eleksiyon ng mga delegado habang P500 milyon para sa operasyon ng Concon.
