Ai Ai, naiyak sa launching ng Direk 2 Da Poynt

STAR-STUDDED ang ginawang paglulunsad sa libro ng namayapang si Direk Wenn Deramas, ang Direk 2 Da Poynt na inilimbag ng VRJ Books, ang publishing label ng Viva Communications Inc., na mabibili na ngayon. Hindi naiwasang maging emosyonal ng mga dumalong kaibigan ng director.

Isa na si Ai Ai delas Alas na hindi napigilang hindi maiyak nang ilahad ang mga pinagdaanan nila ni Direk Deramas. ”Hindi ako makapaniwala na wala na siya. Alam naman niya kung gaano ko siya ka-love. Kung nasaan ka man, alam mong mahal kita,” ani Delas Alas.

Matagal nagkatrabaho sina Delas Alas at Deramas na nagsimula noong 2003 sa Ang Tanging Ina.

“Marami kasi akong gustong sabihin pero hindi ko alam kung paano ko sasabihin, paano ko tatapusin. Basta iyon pagmamahal ko na lang sa kanya, pagiging magkaibigan namin ang nasabi ko,” sambit ni Delas Alas nang tanungin siya ng abs-cbn news.com ang dahilan ng kanyang pag-iyak.

SHOWBIZ KONEK – Maricris Valdez Nicasio