HATAW! D'yaryo ng Bayan hatawtabloid.com
CAGAYAN DE ORO CITY – Pinatawan ng tatlong buwan suspensiyon habang pinasasagot sa kasong kriminal ang kontrobersiyal na si Cagayan de Oro City Mayor Oscar Moreno, kasama ang dalawa niyang department heads sa Sandiganbayan.
Ito ay sa kabila nang nauna nang dismissal order na ipinataw ng Ombudsman kay Moreno, at kasong administratibo.
Nakitaan ng probable cause ng Ombudsman ang pinasok na lease contract ni Moreno sa isang local contractor para sa Sports Development Program for Professional and Amateur Boxing noong 2013.
Iginiit ng Ombudsman, nilabag ni Moreno, kasama sina City Budget Officer Percy Salazar at City Accountant Beda Joy Elot, ang nakasaad sa Local Government Code na dapat humingi ng pahintulot mula sa City Council bago pasukin ang isang transaksiyon.
Sa paglabas ng P175,000 pondo ng lungsod bilang pambayad sa nirentahang bahay para sa boxers ngunit hindi ito dumaan sa konseho ng lungsod.
Ito ang dahilan nang pagpataw ng tig-tatlong buwan suspensiyon sa kanila habang pinakakasuhan ng paglabag sa Section 3(e) ng Anti-Graft and Corrupt Practices Act.
