HATAW! D'yaryo ng Bayan hatawtabloid.com
KORONADAL CITY – Bumagsak na walang buhay ang isang sinasabing notoryos na carnapper at drug trafficker makaraan manlaban sa tropa ng pulisya at Higway Patrol Group sa Gensan Drive, Bo. 2, Koronadal City, sa harap mismo Gaisano Mall kamakalawa ng gabi.
Kinilala ang suspek na si Francis Rano Patricio, residente ng Sto. Niño, South Cotabato.
Napag-alaman, nirentahan ng suspek ang van na pagmamay-ari ni Alexander Borja, residente ng Brgy. Sto. Niño, Koronadal City, noong Hunyo 26, 2016 ngunit hindi na ibinalik ng suspek.
Ayon sa may-ari ng van, tinatawagan niya si Patricio ngunit hindi na makontak at napag-alamang ginagamit ng suspek ang sasakyan sa pagnanakaw at illegal transaction.
Habang sinabi ni Supt. Barney Condes, hepe ng KCPS, sangkot ang suspek sa serye ng carnapping, robbery, robbery holdup gayondin sa pagtutulak ng ilegal na droga at may pending warrant of arrest sa kasong kriminal na inilabas ni Judge Jordan Reyes.
Nakuha sa sasakyan na minamaneho ng suspek ang isang fragmentation grenade, 357 magnum revolver, homemade cal 5.56mm, live ammunitions at limang sachet ng pinaniniwalaang shabu.
