HATAW! D'yaryo ng Bayan hatawtabloid.com
ZAMBOANGA CITY – Arestado sa joint operation ng PNP at militar sa lalawign ng Sulu ang tatlong lalaking responsable sa pagdukot sa 2-anyos paslit sa Brgy. Arena Blanco sa Zamboanag City.
Nasagip ang biktimang si Haima Taji na ngayon ay kapiling na ang kanyang mga magulang sa Zamboanga City.
Personal na pumunta sa lalawigan ng Sulu para sa operasyon ang station commander ng Zamboanga City Police Station 6 na si Supt. Nonito Asdai at dumiretso sa Brgy. Anuling, sa bayan ng Patikul kasama ang mga pulis sa Sulu at mga sundalo.
Nabatid na ang mastermind sa pagdukot sa bata ay si Danny Abdurasad Patta, 28, residente ng Brgy. Hambilan, Siasi, Sulu dahil sa utang sa kanya ng ama ng biktima na P20,000 at matagal nang hindi nababayaran.
Kasabwat niya ang dalawa pang nahuling suspek na sina Muktadir Musa Mohammad, 41, at Haron Sahirun, 52, parehong mga residente ng Brgy. Langhub, Patikul sa Sulu.
Ayon kay Patta, pareho silang mga mangingisda ng ama ng biktima at nangutang sa kanya ng P20,000 na lumaki na rin dahil sa interes na hindi nabayaran nang ilang buwan.
Dahil dito, wala aniya siyang naisip na paraan kung hindi ang dukutin ang paslit para makuha nila muli ang inutang na pera ng kanyang mga magulang.
Ang bata ay dinukot nitong Martes mula sa kanilang bahay at agad dinala sa Patikul, Sulu.
